الشاعر قيصر مخايل , شاعر مميز في الشعر المحكي اللبناني , ناشط ثقافي شارك في تأسيس واطلاق أندية ثقافية في منطقة زغرتا و البترون وشمال لبنان , عمل في إعداد وتقديم برامج إذاعية ثقافية , يهتم بالزهور الفواحة عطرا ..

قيصر مخايل , تذوق الشعر منذ ريعان الطفولة , والده الشاعر مخايل مخايل غدف عليه محبته ورعاه تحت سقف من أجمل القصائد .

الشاعر قيصر مخايل مع والده الشاعر مخايل مخايل

موقع ” ميزان الزمان ” زار بستان الشاعر قيصر مخايل , وقطف باقة من شتوله في الشعر المحكي ..وهنا بعض القصائد :

باقة من القصائد المحكية

للشاعر قيصر مخايل

-1-

(((شمس)))

دقّ الجرس قومي نزلي مْن العين

بدير القلب صار لازم تصلّي ..

لا تحرِقي البسمه … الدمع خلّي

يسقي الورد تا يفتحو زرّين

يحمل عبيرو وع السّما يعلّي ..

قومي قطفي صِبحيّة الرعيان

مدّي إديكي عالجرد كلّو …

سقف المدا نْ ما قدرتِ أوصَلّو ..

يمكن صبيعي تكَوّنو مْن زْمان

رسمو الحرف ع شْفايِفك برشان

حرقو القصايد والشعر عَلّو …

-2-

صبحية شعر…..

جنِّي بعد…

جنِّي بعد خزْقي تلج لوراق …

صار الحبر عا مبسمك يشتاق …

صارو الدوالي بيدمعو

صوت الوجع عم يقشعو

كيف البشر م بيسمعو

نهدة قلب مشتاق…..

-3-

مخنوق صوت الصدر بتيابك

وداب الخمر بشفايفك تا طاب

قطر الندي تمرمغ عَ شبّاكك

و صار القمر شحّاد عَ بوابك

يشحد لَ نورو من حلاكي غياب

ونجمات عم بتلوّن الشهوه

تغلغل بشَعر محرّر ومبلول

متل لكأني سمعتها بتقول

طالع ع بالا تشرب ل قهوه

و تدوق شَفّه بتمّك المعسول

-4-

كزدوره

رصاص القلم ما بيحكمك إعدام

بيرسمْ عيونك للعمر صوره

ما بيمحيا وقت بمدا الإيَّام

ولا بتهلِكا مرجوحةِ الأحلام

وفيها ل نظر هربان كزدوره

-5-

سألتك يَ حالي ما عِرفتَك مين

منَّك حبر عرقان بي عطر الصلا

ولنَّك ورق غفَّا حنين سْنين

صفنةْ وفا هربان بِغيوم الفلا

مينَك إنِت تَتسابِق التكوين

وترسم عَ حيط البال تنهيدةْ حلا

-6-

“حب و هجر “

قومي مْرقي عالعين مِشتقلِك

صار النظر عطشانِ تا تْطلِّي

وشمس الصبح عم تسرقِ مْحلِّي

لِمِّي خيالِك .. ما غِرت قبلِك

وْلا عرِفت غير الحبِّ إندهلِك

بعدِك بِ دير الهجر بِتصلِّي …..

-7-

“عمر الوقت ايام”

هزِّي معي سرير الوقت تا ينام

بعدو طفل ضايع بِ أحلامو

و بعدو العمر عم يسرق الإيَّام

بيمحي عَ مهلو فرحةِ الأحلام

بيطفي بْوَما قنديل إيَّامو

هزِّي معي غيم السما كلُّو

رشِّي النِّدي تا تضحك النسمات

شدِّي السطر تا يحمل الكلمات

صَوْتِ لْ فِكِر مَا قِدرِ يُوصَلُّو

غير اللِ خِلقو عالأرض بالذات

( الشاعر قيصر مخائيل / لبنان )


يوسف رقة